ஸௌராஷ்ட்ர தே3ஷம்மு ஸேத்தெ அமராபுரம் மெநரெ கா3முக்3, ஜயஸேனா மெனரெ க்ஷத்ரபதி (ராஜா) ராஜ் சல்லே ஹொன்தேஸ். தெகா3 ராஜ்யம்மு, அட்3புட3ம் காம் கெரரெ து3ஷ்டுனுக், கடூ2ர த3ண்ட3ன தே3த்தெ வட்3கெ3க3ன் தெ2வ்லி ஹொன்தேஸ். தெவ்ளாகூ3ஸ் தெனுன் சொக்கட்3 தெனுன்க3ன் மர்ச்சான் மெனி தி ரஜ ஹட்வேஸ். திஸோஸ் த3ண்ட3ன தெ3ய்லே ஹொந்தேஸ்.
ஒன்டே தி3ந்னு த3த்தா மெனி ஒன்டே ஸந்யாஸி தெகா3 ஸபாக்3 அவேஸ். ரஜ, ஸன்யாஸிக் ரவ தி3ன்னு ர்ஹீ ஜனொ மெநி மெந்லெஸ். ஸெர்கமெனி ஸந்யாஸி தேடூஸ் ர்ஹேஸ். தி ஸந்யாஸி, அட்3பு3ட3ம் கெரரெ நட்டாமுட்டி மெந்கானுக் த3ண்ட3நெ தே3த்தெ விதமுக் க3வ்ஞ்ச்சேஸ். கள-பனி பீத்கி தெ3க்கேதா4னுக் ரெத்து தொ3வ்ட்3லி அவே ரத2ஸாரதிக் கின், கள-பனி பீத்கி ப4ந்தே3 பை3லுக் ஹனே த3ல்லாக் கின், கள-பனி பீத்கி ஸெங்க3திக்3 கத்தீம் குஸ்கேத்தெக3 கடூர தண்ட3நெ தே3ஸ்.
பீ2ர் தி ஸன்யாஸீக் ஸீ, மொர் நிர்வாஹம் கிஸொ ஸே? மெனி புஸேஸ் ரஜ.
" ரஜா... தொர் நிர்வாஹம் ஸெர்க்க ந்ஹீ, விதா3 கியாதி3 மெந்லி, த3ள்க ப2ட்லுங்கொ3" மெனி மெனேஸ் தி ஸன்யாஸி.
உல்கி பொடி3 ஸன்யாஸீக் ஸேஸ் ஜயஸேனா. "கா இஸொ மெநராத்தெ?" மெனி புஸேஸ் ரஜ.
ரஜா... து கடூ2ர த3ண்ட3நெ தீ3 காய் பிர்ஜேன்? நித்தெ இஸோஸ் ஜுகு3தெனு த3ண்ட3நெ அனுப3வின்ச்சோராஸ். கோட் அட்3பு3ட3ம் காமுன் உன்ன பொடே3ஸ்? வேநீஸ் ஹொய்லே ஸே ! தெக3 ஹால் ஏ துஷ்ட காமுனுக் மூல-காரண காய் மெனி களய்லி, தி காரணாக், நிவாரண கெரெத், திஸா மெந்கான் து3ஷ்ட காமுன் ஸொட்டிகி, சொக்கட்3 தெனு ஹொய்ஜான் - மெநி மெனேஸ் தி ஸன்யாஸி.
ஸபா3ம் அஸ்கின் மூல-காரண காய் மெனி சிந்தன கெர்லே ர்ஹாத்தெ வேள, ஸந்யாஸி, ஸங்கே3ஸ், " கள-பநீஸ் மூல காரண. ! போ3தா3மூஸ் அபசார் கெரராஸ் தெனுன்.!!
கக3 கு3ரிஞ்ச்சி ஜுகு3தெனுன் கள-பனி பேராத்தெ ? தும்கக்3 களாய்கா3? மெனி புஸாஸ் ஸன்யாஸி. தி புஸ்கிநீக், " மந்திரி ஒன்டென ஹுடிகி3ன், "கள-பனி ஸொங்கக அப்போர்தெ ஹாலீஸ்" மெனி ப4ர்த்தி ஸங்கேஸ்.
" அஸ்கினாக் ஸூலுவ் க3ன், ஸொங்க3க3ன் கள-பனி அப்3போ3ர்த்தெ லெங்கா3ல், பீத்கி, ரெச்ச கெர்ராத்தெ. மெந்கான் நஜ்ஜாத்கொ தூஸ் வாட் தெ3க்கட3ரெ ஸொக3ன் ஸே யெ விஷயம் " - மெனி மெனேஸ் தி ஸன்யாஸி.
தெவ்ளாகூ3ஸ், தி ரஜாக்3, தெகா3 ந்ஹிரீத (fault) அர்த்து பொடே3ஸ். தெத்தே கெ4டீ3ம் கள-பனி விக்கினீக் ஹிப்3பி3 ர்ஹவட்டிகெஸ்
No comments:
Post a Comment